現年29歲嘅新民黨元朗區議員黃卓健，下星期一會喺博鰲亞洲論壇閉幕晚宴上發言，講番佢八年前放下收入好好嘅義肢矯形師工作，以1,000蚊創立社會企業「長者家」嘅辛酸史。由於新任國家主席習近平都係席上客，佢話上月收到邀請時，都有啲淆底㗎，但最終都應承咗，會用膽識戰勝呢八分鐘發言時間。
全城熱論第一夫人彭麗媛，黃卓健話呀，如果屆時有機會見到習夫人嘅話，最想問佢第日有外孫時，會唔會畀佢哋飲內地奶粉？佢話咁問法唔係想鬧內地人嚟港搶奶粉，而係希望衣服手袋都用國貨嘅習夫人，可以表態支持國貨奶粉，等民眾有番信心啫。