【本報訊】中電控股（002）周三突然宣佈，將已出任集團常務董事及首席執行官13年的包立賢「升上」大股東私人公司，並委任現時主管香港供電業務的中華電力總裁藍凌志出任其職位。證券界普遍認為，調動顯示中電將在電力市場檢討中「企硬」，市民恐要繼續「捱」貴電費。
記者：陳健文
中電在周三收市後公佈有關調動，有外資分析員表示，對公佈時間感到少少意外，惟調動則是預期之內。他說：「中電以往啲首席執行官或行政總裁，好多都唔會做太耐，好似上一個行政總裁施以誠咁，都係做咗七年半，𠵱家包立賢做咗成13年，超晒標啦！」
前年傾加價態度強硬
該分析員續稱：「雖則一早已預咗佢會走，但係喺今年、即係進行電力市場中期檢討嘅時候換人，我就覺得有少少意外，因為包立賢始終都叫做搞過08年嗰次電力市場檢討……但可能中電會諗，今年應該係無乜變化，最重要都係五年後嗰次，所以畀其他人熱吓身先。」
相對包立賢，證券界及市場人士普遍覺得藍凌志態度較為強硬，從他前年就電價加幅所擺出的態度可見一斑。
一外資基金經理說：「嗰次（2012年電費）我都好驚訝中電個態度擺到咁硬，特別係藍凌志出嚟講嘢個樣，好少見中電嘅人咁樣講嘢……中電最後雖然都係屈服咗調低加幅，但之後明顯見到中電嘅態度完全變晒，連主席都要自己出嚟炮轟政府，明顯有啲嘢變咗。」
藍凌志於2011年12月中「拋出」高達9.2%的加幅，更表示有關加幅是「能力範圍內做到最好」，表現出完全「無彎轉」。其後中電雖在各方壓力下，將2012年電費加幅下調至4.9%，惟最後出來打圓場的，卻是近年極少處理電費事務、處事較溫和的中華電力副主席阮蘇少湄。事件反映中電「力撐」態度較強硬、屬鷹派的藍凌志。
本報就今次人士變動、是否跟今年利潤管制協議中期檢討，及相關協議於2018年到期有沒有關係向中電查詢，中電的回應是集團業務方向不會因管理層人事變動而改變，而有關管制計劃協議的中期檢討，中電將與政府緊密合作，根據協議的既定機制進行。
利潤管制 五年後到期
中電又表示，會繼續聆聽各界持份者對有關檢討的意見，並承諾會繼續致力為香港的長遠成功作出貢獻。
康宏證券及資產管理董事黃敏碩表示，由於中電是一家業務涉及多個地區的跨國電力企業，不認為會單單因為行政總裁改變而出現翻天覆地的變化。他說︰「由於藍凌志係紅褲子出身，有可能幫到中電做到啲突破，但始終有好多嘢係冇得變，好似香港嘅利潤管制法則商討咁……我唔認為單單一個人，可以對中電構成重大改變。」