這不是IQ題，答中亦無獎，過去幾天（與清明也無關），我們家裏有哪一位親屬最多人問好？想你脫口而出的也就是「哥哥」，其實係真嘅親哥哥的話，我哋都只會叫「阿哥」、「大佬」，不過現且只此一人，往後看怕亦無來者，可教一眾都懶親切咁尊稱他「哥哥」。我完全無意開玩笑，搞爛gag，尤其是打從十年前的愚人節開始，已然少了一份「搞笑」的心情和空間去應節，而今年適逢這位巨星離世十周年，媒體潮湧的懷念報道，坊間形形色色的追憶活動，再加上網絡廣傳的分享轉載，念不得也「哥哥」。
猶記那天晚上，如常工作到七點多，回家前去了家連鎖超市購置日用品，最重要的是要買口罩。忽地收到在上海工作的舊同學來電，語氣緊張，若無來電顯示，肯定以為是那些電話騙案，接下一句仲嚇人：「哥哥，係唔係自殺呀？」還未定過神，心想我們可有那位結拜兄弟出了事？不對，今天是愚人節，不過人命攸關，這樣的越洋玩笑也未免太過份了吧？不過同學聽我沒啥反應，馬上補白：「我收到訊息話Leslie啱啱喺文華……」好不容易聽完這通電話，驚魂未定，然後忙着向其他人求證，另方面已準備，一旦知道是惡作劇，搞不好可要與人絕交。
可惜到今天我們還是朋友，每次見面也會談起「哥哥」，而嗰晚我在超市騰咗好耐先返到屋企，才發覺乜嘢都唔記得買，只記得當時感覺確係有啲「買怕」，香港唔係要衰成咁吓嗎？連一隻冇腳嘅自由雀仔，從來都係好哋哋喺天上面飛，而我哋亦有幸能夠欣賞佢嘅歌聲舞姿演技才氣，怎會無端端咁快就落地着陸？往後那幾天混沌得很，看到電視重播他璀璨的演藝生命和訪問其摯友，他們都情不自已，而我亦都係一樣。
演阿飛正傳戲味十足
雖然我的青春期正值「哥哥」大紅之時，不過當日的我既非「榮黨」也不屬「麟派」，卻鍾情於今日的「林伯」，還有此志不渝的「達明」，點解？咪就係要別具一格，與人不同囉。
不過，年紀大了，毋須透過「迷偶像」——這個成長必經過程以建立身份認同，我亦逐漸變節投「哥」。當中，應以身受《阿飛正傳》的毒害最深，這部電影不單為「哥哥」贏得第一座的最佳男主角獎項，奠定他的影帝地位，且也讓人見識甚麼才是舉手投足，眉梢眼角都是戲。
唔怕失禮，我第一次睇《阿飛》，真係唔明套戲想講乜，淨係知啲配樂縈繞不散，仲有「旭仔」啲溝死女神態同嗰part獨舞，驚為天人。就係咁，我起碼喺戲院睇咗齣戲六、七次，以後的事也就是「要記得嘅始終會記得。」
然而，最記得還是那天晚上6點43分，因為由嗰一分鐘開始，一切成了永恒，這是事實，誰也改變不了，因為已經過去。
盧先亞