Kempinski嘅位置得天獨厚，花園泳池地帶睇落已經大過曼谷四季酒店塊地皮，花園內有大大小小泳池，樹木多，在內不聞街外汽車噪音，似置身郊外，但一出酒店門外就係交通最繁忙地區。酒店有高座低座，低座地下一層嘅房間，一推開門就可步入泳池，專心到曼谷嘆世界者大可考慮。
但到咗黃昏時間，若要坐汽車出入就辛苦咯，第一晚左丁山訂咗Zanotti七點鐘，因左太不便在曼谷高鐵（好缺乏電梯，幾十級樓梯幾惡頂）上落，一定要坐的士，單係從酒店大門出到大馬路，已用咗四十五分鐘，卒之花了一小時才可到達。晚上九點半回程時坐的士，只用咗十一分鐘。第二朝左丁山特登沿同段路步行出到大馬路（水門附近），只係行咗十五分鐘而已。從酒店行去高鐵站，唔駛五分鐘，以高鐵站為出發點，步行往Central World係十分鐘，去四面佛約十五分鐘，到四季酒店頂多二十分鐘，方便到極，但對行動不便，老年人嚟講，上落高鐵幾乎不可能，出入必需汽車，上午猶可，午後曼谷四處交通擠塞，到處行不得也。
泰國A知道左太出入要坐車，特登為我地租咗一架十一人Van仔（因租唔到房車），每日租金1800銖，連司機不包油費路費，比起在北海道租車自駕遊每日需要一千港元，仍算便宜。因有汽車及司機，可以去遠啲。於是心思思走咗去母校新校園一行，新校園位於Rangsit，過舊機場再去，離開市中心約四十分鐘車程。
一入新校園，左右四望。乜大到咁？東南西北一時之間不辨方向，校園內人工湖、水池、林地好似仲多過校舍及宿舍，粗略屈指一算，似乎可以將香港八間公立大學放晒入嚟（以香港建築密度計）。泰國不缺土地，但泰國政府願意將咁龐大地皮撥俾法政大學，顯見決加強高等教育之決心。校園內不見有法政之傳統學院（文、法、政、新聞、社會、經濟及商管），只見有以前所無嘅理工科技及醫學院，有埋大學醫院及幼稚園㖭。後來問泰國A，始知母校之舊faculty全部不願意搬入新校舍，情願留在眉南河畔之舊校，故此新校園闢作全新理工醫學院之用，還有一間詩琳通公主贊助之東亞研究所，但教授好唔鍾意入新校園教書，令大學幾頭痛！