中港交往頻繁，內地華東地區爆發H7N9禽流感，港人難免提高戒備，但有時為咗工作，避無可避都要北上。香港會計師公會會長趙麗娟（Susanna）近日就身在上海開會，佢話都唔驚得咁多，惟有轉食齋咁滯囉。
噚日搵開Susanna傾偈，先知佢喺上海公幹，單喺上海已經有兩宗H7N9禽流感死亡個案，都咪話唔擔心。
飲啖水都要小心
Susanna直擊當地情況，雖然話市面氣氛唔係好緊張，但無論遊客還是當地人，都會特別留意飲食，「喺呢度，雞唔食得，又怕人撈起黃浦江啲死豬賣，所以豬肉又唔食得，咁就惟有食多啲菜啦！」
除此之外，佢哋因為怕食水可能受到死豬污染，所以連飲水都要特別小心，盡量將水煲滾啲先至飲用。
業績期啱啱結束，聽講暫時未有上市公司搵一大班分析員或者財經演員北上巡視業務，就算有都應該安排喺本月下旬之後，𠵱家內地有禽流感，分析員都唔恨北上。
股評人鄧聲興坦言，如果家陣有上市公司邀請佢北上睇業務，佢都會視乎禽流感疫情有冇惡化先決定去唔去，若然迫住北上，惟有小心飲食，盡量少食家禽，健康要緊吖嘛。
李華華
mailto:[email protected]