上市公司派股息、紅股或認股權證閒過立秋，有冇人聽過派乳產品吖？深圳A股南方黑芝麻集團前日就通過，向每持有1,000股嘅股東，派一盒12罐黑芝麻乳產品，藉此收集股東對公司新產品嘅睇法，堅係實物分派呀。
照咁諗，本港上市公司都可以有樣學樣，好似話維他奶（345）、蒙牛乳業（2319）派奶，味千（538）派麵，思捷（330）同包浩斯（483）派衫，不過派還派，公司最緊要派埋股息，如果淨係搞呢類實物分派，股東會肯定好戲連場，小股東示威抗議都有份。
南方黑芝麻集團嘅總股本係1.78億股，即係最多派17.8萬盒黑芝麻乳產品，當作宣傳推廣，製造話題，點都抵，估唔到內地上市公司老闆咁多計，遲啲會唔會有內房股派樓呢？