香港地物質豐富，不過近年香港人生活就唔多開心，喺奶粉、學位樣樣都要爭嘅情況下，自然積埋唔少怨氣，難怪喺國際機構做嘅快樂指數調查中，香港只得41.6分，唔及格，全球排名第84，比社會動盪嘅伊朗、伊拉克仲要低，係全東亞區最唔快樂嘅地方。
暫定20集 日本外景
香港人生活壓力大，日日愁眉苦臉咁樣過日子確實唔係辦法，曾志偉有見及此，覺得「獎門人」係時候要出動，要將歡笑再次帶畀觀眾！據了解，新一輯暫定20集嘅《獎門人》節目，會喺下月推出，但節目名、玩乜嘢遊戲都仲未定，所有嘢要等志偉慶祝完60大壽至決定。主持方面，除咗靈魂人物獎門人志偉外，仲號召晒所有「獎老」幫手，包括啱啱做老竇嘅錢嘉樂、就嚟做老竇嘅陳小春，仲有林曉峰、金剛、阮兆祥同王祖藍等，邊個得閒就會加入，仲會去日本幾個城市拍外景㖭。
其實《獎門人》做咗16年，可以話係陪住香港嘅小朋友成長，當年睇《獎門人》嘅小朋友，𠵱家已經係受緊生活壓力嘅成年人，希望佢哋到時開電視睇吓呢個為香港人帶嚟唔少歡笑嘅節目，開懷大笑番餐，接收獎門人嘅正能量。
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/