八方呢排聽到唔少《明報》行家大呻，話集中唔到精神打稿，何解呢？原來係因為有蚊。話說《明報》由農曆年開始，辦公室開始有蚊螆飛來飛去，原本大家都唔係好在意，不過情況越嚟越嚴重，甚至有人試過連打開雪櫃，都有蚊飛出嚟。近月最新發展係，上至總編輯下至小記都齊齊打蚊，仲有同事帶埋蚊拍返工「搏殺」。
為免蚊患進一步失控，《明報》早幾日原來搵咗滅蟲專家幫拖，搞掂一場蚊災。
八方聽聞，《明報》出動到精銳嘅偵查組深入調查，終於喺同事嘅盆栽發現有一堆蚊卵，有見過實況者形容蚊卵遍佈嘅情況令人好惡心，結果滅蟲專家就集中處理所有盆栽。專家仲話，嗰啲其實唔係蚊，係蠓。