患咗感冒嘅民建聯鍾樹根，明知有病在身都要去南韓考察環保，八方都唔知讚佢勤力好、定係話佢去外國散播病菌好。
噚日Tree根喺facebook自爆感冒藥食晒，焗住要喺南韓睇醫生，食完藥再開工。八方好奇嘅係，佢係用乜嘢語言同當地醫生溝通呢？
講番呢次立法會環境事務委員會嘅考察團，即將結束行程返港。有份隨團嘅新同盟范國威話呀，每次去食飯，搵勻成張餐枱，都唔見有牙籤，原來要問侍應攞先有，而且要收錢。而呢啲要畀錢買嘅牙籤亦唔簡單，主要成份係綠色薯粉，可被生物分解，換言之你擔住支牙籤一陣，支牙籤會溶咗喺口㗎。