新任旅發局主席林建岳上任第三日，已經帶隊去台灣宣傳香港；查實岳少曾經喺台灣住過，有過台灣女友，幾乎當咗台灣係佢第二個故鄉，好鬼熟地頭。今次旅發局都有帶藝人一齊出埠，但唔同嘅係今次「零付出」，因為以往藝人幫旅發局宣傳雖然唔收酬金，但旅發局都要負責畀商務艙機票、酒店、化妝費等，去一次台灣，每個藝人至少要用兩、三萬，但今次隨團嘅任賢齊同周麗淇就全數自費。周麗淇係岳少旗下藝人，肯咁做唔奇，但小齊又點解肯倒貼？岳少笑笑口話，知道小齊咁啱要返台灣宣傳，咪叫埋佢囉。岳少同藝人相熟，幫到旅發局慳錢㗎。