睇見有啲商家如此待薄工人，有好工喺手嘅人真係要倍加珍惜。一直致力推廣同志平權嘅立法會議員陳志全（慢必），相信都係良心僱主；佢上月喺勞工處網頁請「議員辦公室經理」，月薪高達2.3萬㗎，出手認真唔低。慢必話，呢份工要管理幾位議員助理，責任唔輕，仲話如果真係有高質素嘅人應徵，唔介意畀多5,000蚊，自己倒貼又點話？
份工要求應徵者大學畢業，中英文流利，喺金鐘返工，雖然冇講明要幾多年經驗，但慢必就話喎，希望最好有3年啦，所以好歡迎其他議員助理跳槽、或者現職記者應徵，唔知其他議員同傳媒機構，會唔會考慮加薪留住好人才呢？