住在曼谷Kempinski酒店，半夜覺得凍，紮醒後搵冷氣機掣，又唔想開晒燈搞醒老婆，只靠浴室之暗燈照明（因浴室與睡床只有透明玻璃相隔）去摸索，點知冷氣機掣藏在床頭燈後之牆壁，要伸個頭過咗床頭燈先至睇到如何調校溫度，一伸，又撞親個頭。唉吔，一枝黑色Reading Light（床頭閱讀燈）係長方形，向前伸出半呎，剛好在床頭燈之後，左丁山不知就裏，燈光暗之下，再度領嘢，哎吔一聲，嘈醒老婆，俾佢贈兩句：「咁鬼論盡，動作細啲啦！」
房租包早餐，其實羊毛出自羊身上，「包早餐」係促銷房間工具啫，偏偏左太最緊張早餐，次早還想繼續瞓，已經俾左太推醒：「快九點嘞，早餐十點停止供應。」佢又小心噃，未出房，先睇吓酒店之餐廳dress code（衣着守則），說明不可穿短褲、無袖背心及拖鞋，左太讀出嚟，左丁山一聽就笑，曼谷噃，天氣咁熱，酒店點樣執行呢啲「守則」？不過左太要左丁山遵守呢。
吃早餐之餐廳就在𨋢口隔籬，裏面有好多住客食客，聽到起碼有一半人講香港式廣東話，我地一坐低啫，後面就有人喝一聲：「呢度呀！」一聽就知係港式中坑啦，位仁兄就係着件冇袖背心、短褲、拖鞋，左手揸住iPhone，右手搓住肚腩，與伴侶坐低五分鐘就推門出去花園泳池地段食枝煙仔先，典型「香港佬」也，左太低聲問：「又話有dress code嘅？」左丁山答：「俾你睇㗎嘛。」
花園泳池與宏偉大堂又係Kempinski兩大賣點，此日酒店有摩根士丹利在此開會，及資生堂之亞太區美容顧問召開訓練講座，唔怪得大堂內與花園泳池有百幾個靚女穿着同款服裝出沒。此酒店與Siam Paragon合共佔地四十幾至五十畝，三十年前仍是Siam Intercontinental酒店，當時酒店房間不多，前面冇商場，酒店後面就闢為專用高爾夫球場，吸引好多賓架入住，最多大通銀行（Chase）啲高層，因為Chase辦公室就係在Siam Center。成幅地由泰皇太后擁有，太后仙遊後由公主詩琳通繼承，銳變改建發展成為大商場大酒店，係現時曼谷最吸客，人氣最旺嘅場地。詩琳通公主曾來港到中大聽書一日（劉遵義校長安排各大教授為佢講述不同專題），出席晚宴時對左丁山講過：「我要經營好Paragon，收益多啲，我嘅慈善基金就會做到更多善事！」