中超1哥FC廣州，噚晚喺天河體育中心上演嘅亞冠盃F組分組賽，憑有老婆同囝囝親臨打氣嘅孔卡梅開二度；加上準爸爸穆里奇同郜林各建一功，終以4:0大炒泰超勁旅蒙通聯，3戰得7分企穩小組首名！
砌佢啦……可以容納6萬人嘅主場館，我求大俠噚日都係觀眾之一，唔知係咪落雨關係，現場大約只有一半多啲座位有人坐，估計近4萬球迷。佢哋由5點幾開始入場，仲一齊着住撐主隊嘅紅衫，唱住歌為球隊打氣；呢份霸氣，真係唔係平時坐喺電視機前睇直播可以feel到。
老婆撐場 孔卡發威
巴西前鋒穆里奇日前同大肚太太艾麗妮去影樓拍溫馨相晒幸福，隊友孔卡都唔輸蝕，太太Paula賽前帶埋囝囝班哲文撐場。雖然呢位阿根廷中場上半場屢次為隊友製造機會；包括25分鐘喺進攻右路開出角球，畀巴里奧斯頭槌中楣，但半場仍被蒙通聯悶和。
不過，皇天不負好爸爸，孔卡易邊後僅7分鐘，接應郜林右路傳中，無人看管下頭槌頂成1:0。至於準爸爸穆里奇亦當仁不讓，6分鐘後同巴里奧斯撞牆，喺禁區內順勢射成2:0，入波後更做出吮手指慶祝動作。
人逢喜事精神爽嘅穆里奇，做完入波英雄後，仲造就上半場多次失機、被國內球迷揶揄為「飛機」嘅前鋒郜林，完場前6分鐘嘅入球擴大至3:0；加上孔卡12碼「埋齋」，終以4:0大勝。FC廣州贏波後除咗基本獎金600萬，淨勝4球再加碼800萬，全隊總共瓜分1,400萬人仔（約1,750萬港元），難怪個個笑到見牙唔見眼。
花絮
