十幾個立法會議員身在南韓考察，星期五返香港，原本民主黨涂謹申都隨行，點知佢話因為南、北韓關係緊張，朝鮮仲話要戰略導彈候命，佢評估過風險，覺得既然有黨友去，自己仔細老婆嫩，所以臨陣做咗十個救火的少年，留港陪囝囝同老婆過復活節。
閒來喺屋企冇嘢做，阿涂就執吓嘢啦，點知畀佢發掘到一張經典陳年舊相；睇真啲，竟然係97年，香港未回歸前嘅立法局去英國訪問嘅相片。
嘩，那些年嘅立法局議員，個個都好後生呀，阿涂話同行嘅人面目全非，令佢好感嘆。點解呢？因為當時真係星光熠熠，除咗有佢、卿姐、吳靄儀，亦有當年嘅自由黨李鵬飛同周梁淑怡，以及轉咗做議員、有「鮮忌廉」之稱嘅前衞生福利司黃錢其濂。阿涂憶述當年好似見到仲在野嘅貝理雅，唔知貝理雅記唔記得佢哋呢？