內地H7N9禽流感越爆越犀利，市民都驚內地又隱瞞疫情，香港隨時要殺雞。經常幫政府查疫症嘅港大微生物學系講座教授袁國勇，噚日被問到𠵱家會唔會食雞，佢就話自己會照出街食飯，冇正面回答問題。
記得97年香港回歸無耐就爆禽流感，當時嘅衞生署署長陳馮富珍公開話自己日日食雞，企圖淡化事件，可惜後來疫情越嚟越嚴重，要全港殺雞，陳太被人翻舊賬，之後仲被起咗個花名叫「雞珍」。
近日內地禽流感爆發，內地每日有7,000隻雞供港，市民再度關注食內地供港活雞仲安唔安全。袁國勇昨日被記者問到，𠵱家會唔會食雞時，笑笑口話自己冇呢個問題，照樣出街食飯，冇正面答到食唔食雞，認真冇吉士。