八方早前報道過，一到午膳時間，政總公僕「蝗蟲」就會殺入立法會canteen搵食，貪嗰度又平又抵食，至少比政總平均平3蚊喎。但佢哋咁樣，卻令喺立法會內嘅職員、議員助理甚至議員嘅「飯碗」受影響。立法會秘書長陳維安透露過，會諗諗計仔捍衞立法會人嘅本土權益，結果終於落實「限飯令」。秘書處噚日宣佈，由下星期一開始，每日中午12點半到1點半呢段時間，立法會canteen會預留一半以上座位，只供立法會人員使用，試行一段時間、再睇吓效果點樣，先至再檢討。據知唔少議員助理都好happy，有人仲大讚陳維安光復canteen。