現年34歲嘅糖兄（潘雲峰）噚日同拍拖8年嘅女友阿Miu（繆家明），喺尖沙嘴舉行結婚酒會，拍檔糖妹（黃山怡）做司儀，好友蔡恩真、陳柏宇及蔡穎恩等到賀，阿Miu谷出3吋事業線。糖兄喺現場同老婆恩愛咀嘴外，又同隊band唱咗首由佢作嘅歌《我要結婚》送畀老婆，冧到爆。糖兄接受訪問，話噚日主要招待圈中好友同傳媒，過幾日再註冊兼擺酒，到時想低調只同家人一齊。
糖兄話前晚都緊張，好彩一覺瞓天光，佢話婚後好多工作，所以遲啲先生BB。有乜愛的宣言？糖兄話：「我係一個好丈夫，真心一句就夠。」老婆阿Miu即話：「希望繼續keep落去。」Miu又大讚老公好叻，有99分，之前聽到老公作首歌已感動到喊。
糖嫂：好自為之
不過糖兄台上自爆噚晚老婆贈咗四個字畀佢，好自為之。糖妹話會送大利是畀糖兄，新居入伙再送大量電器。男友Dominic點解冇嚟？糖妹有啲尷尬同隱晦，糖兄即代答佢好忙。幾時到糖妹結婚？佢話來日方長。另外蔡恩真被問到隊友田代麻衣被影到同男督察喺夜店消遣，但田代稱對方係男友，又話因男友工作敏感被拍搞到要休假，蔡恩真話：「我只知佢哋好愛對方，其他事就唔清楚。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/