【銅鑼灣】保安局前局長李少光個仔李霖恩，喺無綫捱足十一年，舊年喺三線劇集都有佢份，即時成為網民熱捧話題，佢亦人氣急升而為人認識。
一字排開行街街
𠵱家李霖恩主力拍攝處境喜劇《愛．回家》，而已經有一子一女嘅李霖恩，唔使開工嗰陣就會享受家庭樂，前日下晝6點幾，李霖恩同老婆方燕凌（Candy）帶埋3歲半嘅囡囡李清宜現身銅鑼灣，唔知係唔係因為九個月大嘅囝囝仲細個，所以就冇同行。
當日由於啱啱落完大雨，條街又濕又滑，愛妻心切嘅李霖恩全程拖實老婆，而Candy就負責拖住囡囡，一家三口一字排開咁拖住嚟行，場面好鬼溫馨。佢哋一行三人去到附近嘅商務印書館，李霖恩先送咗老婆同囡囡上書局，之後佢就單拖去撳錢。而Candy兩母女入到書局，就主攻英文兒童故事書，Candy好耐心咁同寶貝女講故事，兩母女邊睇書邊等李霖恩，撳完錢嘅李霖恩好快就上返書局同妻女會合，然後就三個人喺書局坐定定睇英文書，真係幸福滿瀉。
採訪、攝影：梁繼光
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/