女人搭上二世祖，仲有機會使佢啲錢；在股海中，遇到「股壇二世祖」就要冇鞋挽屐走，股價隨時一去冇回頭。
去年尾A股絕地反擊，國企炒起，其中有間叫彩虹電子（438）嘅公司，股價曾高位回落逾八成。
或者有人會諗，呢個仲唔係「國企至強抵價」？不過，彩虹電子公佈的業績證明平嘢冇好之外，亦將「二世祖」敗家程度作最淋漓盡致的示範。
該股2011年度由賺轉蝕，虧損2.53億元（人民幣．下同），舊年虧損更倍升至16.6億元，諷刺的是其市值只是2億元多；行政開支因部份生產線關閉，令成本大增六成；經營開支都唔弱，大升三成；銀行結餘和現金大幅減少39%至12.8億元，流動負債淨額約9.65億元。
公司有五項主要業務，其中四項連續兩年要蝕錢。核數師提醒以上重大不明朗因素，或對持續經營能力構成重大疑問，有機會無法在正常業務過程中變現資產及履行承擔。為確保有足夠營運資金，其中一個辦法係要阿媽幫拖。蝕成咁仲肯幫？鬼叫人哋係國企咩！
Samantha
本欄逢周三、五刊出