愛國愛黨未夠，還要篩走所謂對抗中央的人（有咩？）參選特首，肯定難過佔領中環，這一次，阿爺又試「笨神出手」，實會推高佔領人數，平時斯斯文文的西裝友，都會躍躍欲佔，測試自己的抗壓能力。據知有關人士，會積極將佔領中環變奏、接種、轉型、合體、人傳人、移殖……發展成××模式：
路過中環。過路人搭同路人，主客互換場次，行動順勢延續下去。只是路過，唔算違例停泊，唔會抄牌。
嘟嘟中環。嘟一嘟，睇睇有冇增值機會。全港嘟卡持份者，響應嘟的呼喚，關你嘟事，一嘟百應。
爆奶中環。名正言順，師奶媽咪總動員，邊個敢下令限奶！
宅住中環。宅男打躉，將中環變成機地，各區家暴，劇減九成。反正中環已經被地產霸權謀殺了Ｎ次，就算再來一趟肢解中環，都冇有怕，大把人捐冰箱贊助！