泰國Ａ回港飲喜酒，好快就返曼谷，次日就輪到左丁山去曼谷放假，為避免塞車之苦，特登揀夜機去（午夜到達），早機返，在非繁忙時段，從機場到市中心最旺嘅沙炎廣場（Siam Square）只需時三十五分鐘，相等於由沙田到赤鱲角，好快啫。深夜曼谷機場人流少，出關容易到極，最穩陣之交通當然就係坐AOT嘅專車，唔搭機場外嘅的士。AOT櫃枱位租車女士話：「二千二百銖單程？」咁貴？問佢：「係乜嘢車呀？」女士答：「寶馬七系豪華房車。」左丁山即刻話：「日產汽車算啦！」哦，車資立即減到一千一百銖，機場之銀行外匯兌匯率，一美元兌27.72銖（一百元現鈔）折算係美金39.7，再乘7.75，大約係港幣308，粗略相等於一港元兌3.6銖，咦，港紙又貶咗值，以前係接近四算嘅嘛。
司機熟路又揸車穩陣，好快就到咗Kempinski酒店，此乃簇新嘅豪華酒店，開咗只有幾年，大把香港老友向左丁山推薦，最大賣點就係位人氣最旺嘅Siam Paragon後面，從酒店側門行過去，只需半分鐘（Siam Paragon北門第六號閘Gate6），一入去就見到地下超市與龐大無比之Food Court，食肆數之不盡，食物款式繁多，包保搵到一樣係你鍾意嘅！
就因為咁，聽得朋友說話多，左丁山呢次就唔去住慣住熟嘅曼谷四季，走嚟Kempinski（泰國朋友話要發音成Cam-pam-si-key，一般泰國人先至聽得明）。上到房，見識吓啲新派設計，浴缸與大床由透明玻璃阻隔，無遮無掩，簾布都冇，一人躺在床上，可欣賞伴侶在浴缸沖涼，咁透明，有啲唔慣噃，好彩係老夫老妻，冇所謂喇，如果係普通同學結伴而來，或兩兄妹合住一間房，點算好？不過有如此疑問之人，大概都係老餅，新一代室內設計師唔會為咗啲out晒嘅老餅而減少創意嘅。入到房已經係凌晨一點，打開行李，取出日用物品就去刷牙瞓覺，點知幾乎撞扁鼻，新派浴室「鋅盤」似蓮花形，向上升起，用意係防水花四淺，但因為咁，水龍頭都要升高嚟配合，但駛唔駛升高近一呎，再打直向外四分之三呎先至出水呀？左丁山俯低頭噴水就幾乎撞到額頭，第二次小心啲，又撞到鼻哥，未上床睡覺已經想發老脾！