【碼頭風雲】
【本報訊】碼頭工潮第七日，逾400工人昨冒雨退守碼頭門外撐到底。市民眾志成城捐款撐工人對抗李嘉誠，罷工基金向每名工友發放一千元。工人水深火熱，首富李嘉誠昨只向傳媒拋下一句「早晨呀！」便揚長而去。取得禁制令後，國際貨櫃碼頭（HIT）董事總經理嚴磊輝昨即炮轟罷工工人沒顧全大局，警告他們若違反禁令會藐視法庭，「咁咪入去坐兩個星期都唔定。」
記者：馬志剛 簡明恩 林社炳 林偉聰
工潮觸發近一星期，長和系集團作為香港國際貨櫃碼頭（HIT）單一大股東，至今仍未有明確表態會如何解決事件；碼頭管理公司至昨日仍然堅稱自己屬受害者，每日損失500萬元，繼續與外判承辦商劃清界線，拒絕與工人直接對話。
大批傳媒昨晨守候在和黃主席李嘉誠及副主席李澤鉅位於港島壽臣山徑的大宅外。早上8時許，李宅女傭步出向記者說：「李生唔想浪費你哋嘅時間，佢唔會講嘢！」9時19分，載着李澤鉅的私家車率先駛出大宅，但車窗緊閉。李澤鉅木無表情，全程未有回應傳媒提問，私家車即徐徐駛走。
「加人工我做唔到」
近10時，李嘉誠所乘私家車由前後保鑣車護送下離開大宅，李嘉誠主動打開車窗向記者微笑打招呼：「早晨呀！」當記者提問「李生，碼頭運作有冇影響？」、「你同唔同情工人嘅遭遇？」李嘉誠未有回應，關上車窗，司機隨即加速離開。
HIT周一深夜成功向法庭申請禁制令後，董事總經理嚴磊輝昨清早出席電台節目，開腔炮轟罷工工人沒顧全大局。他表示，過去數日許多貨船裝卸貨物已變慢，未來三日約80艘船將抵港，「如果呢啲船去第二啲地方，或者唔覺得香港服務有保障，對整個香港航運業有長遠影響」。他形容，事件發展至今「所有人都輸，輸咗口碑、輸咗我哋喺國際航運業嘅聲譽」。
否認工資零增長
各方矛頭直指HIT，嚴繼續撇清關係，「我再講多次，我哋唔係今次呢個訴求嘅資方，資方係佢哋幾個承辦商」。他說公司願意理解如何改善工作環境，「但一講到錢，就唔係我哋同員工嘅問題，因為係佢哋同佢哋老闆嘅問題」；又希望工友循正式渠道反映，「或者𠵱家全香港人都識我，咪搵我囉，嗱！好多嘢我做唔到嘅，加人工我做唔到」。
嚴磊輝更大玩語言偽術，否認工人工資零增長，因「十年來有加有減過」；又指公司現時是新加坡上市公司，長和只佔當中約20％份額，「係咪要去新加坡人哋門口示威？」，但隨即被主持質問，終承認長和系是碼頭公司單一最大股東。
罷工工友昨決定留守碼頭門外，嚴「呼籲」工人：「貨櫃車係好危險機器，你擺隔籬瞓、喺度露營，貨櫃車一個唔覺意行埋少少，就好難講。」他強調法庭已發出禁制令，「做任何嘢違反個官判嘅，就係藐視法庭。你試下個官叫你唔好做你去做，咁咪入去坐兩個星期都唔定」。他又警告工人罷工牽連大，「再係咁落去，坦白講，冇得撈㗎喇」。
責任卸予外判商
嚴承諾，會在考慮續約時，了解外判工人待遇，查證有否剋扣工資，也會責成外判商不可秋後算賬。他又指，早於工潮兩個月前已跟個別外判商洽談新合約，並取得工人工資要有5％升幅的共識，但被問到與工人要求的20％加幅有距離，及是否有談判空間，他又再將責任拋給外判商，「你唔好問我啦！你問佢老闆啦！」