【西環】甩咗拖都一段日子嘅周秀娜，近日寄情工作拍攝卓韻芝執導嘅電影《爆3俏嬌娃》，戲裏面有唔少打鬥場面，拍之前娜姐已經進行過地獄式訓練，搞到周身瘀痕。
前日凌晨有場戲講周秀娜着住六吋高踭鞋起飛腳，點知佢落地嗰陣不慎拗柴，之後娜姐頂硬上繼續拍落去，雖然佢一直用冰包嚟消腫，不過都係無補於事，前後拍足十幾個鐘到前日下晝至有得收工。
排隊等40分鐘
一收工娜姐第一時間唔係去睇醫生，而係返屋企瞓餐飽。極度疲倦嘅娜姐瞓到夜晚7點至起身出門口，佢喺屋企樓下等埋助手，扶佢去西環一間跌打醫館。娜姐身為公眾人物，為咗唔想搞到醫館唔方便，佢戴咗個口罩先行入去。由於現場好多人幫襯，所以娜姐都要排隊。
據知，娜姐自從習武練功以嚟就因為成日受傷，成為呢間醫館嘅常客，但係都冇優待等足40分鐘至到佢睇醫師。只見醫師捉住佢隻痛腳左鍊右鍊推咗幾吓，娜姐已經叫到鬼鍊咁，搞咗一輪，敷好藥紮好腳嘅娜姐就離開。
採訪：丁寧
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/