【佔領中環】佔領中環，沸沸揚揚，弔詭卻是，政黨都成了鬼見愁，「泛民分裂，鬼打鬼，市民唔信任，係現實」。三年前因政改方案，鄭家富退出民主黨。無黨一身輕，本業律師的他主力證婚，一星期六天在電台開咪，談佔中、論普選。換了戰場，他支持今次非暴力公民抗命運動，樂做一萬分之一，「過去就讓它過去」。大團結，讓市民看到追求民主的赤子心，此時此地，阿富說無黨勝有黨。
「我哋五、六十歲呢一代，好多由黑頭髮等到冇頭髮！」可幸眼前的阿富，頭髮濃密，精神抖擻。普選方案還未出閘，阿爺已大模大樣設限，做過球證又愛踢波，鄭家富形容已到了「球證亂吹嘅地步」，「好似曼聯對皇馬，啱啱蘭尼先紅牌趕咗出場，仲要畀個十二碼，現場球迷個個喊打，只差幾時衝晒入球場」。
「泛民冇本錢再分裂」
不想失控，除了球證「咪再亂嚟」，他說最重要是球迷團結，「我同黃毓民、陳偉業講，泛民已冇本錢再分裂，過去就讓它過去！點計我都一定嬲過你，話晒我都係民主黨創黨成員，連我都可以將恩怨放低，你哋點解唔得？」2010年，主張企硬的鄭家富，因為政改方案與民主黨分道揚鑣，兩年後的今天，昔日黨友何俊仁自動獻身表示願意自動辭職，引發變相公投。
是抽水，還是覺今是而昨非，阿富直言會選擇相信，「你當我阿Q又好、咩都好，雖然卿姐到今時今日都唔肯正式道歉，但我同意何俊仁係曲線承認當年判斷錯誤，中咗老千局。我唔知你有冇啲識咗好耐嘅朋友，佢哋明知自己錯，但唔肯講句我錯嘞，咁大家識咗咁多年，心照就好」。為大局，他說泛民大和解，團結起來，是唯一出路。
外界擔心公民抗命會失專業資格，這個民主老兵滿不在乎，「因為公民抗命自首被拉，講真我心甘命抵，上到律師會討論係咪要釘牌，我諗佢哋面對嘅政治壓力應該大過我」。