色情事業是全世界最古老行業，向來只有嫖客願意接近，其他人避之則吉。偏偏有班女大學生，畢業便主動接近妓女。她們任職「青鳥」，是專輔助妓女的社工。「出嚟做嘢唔可以同屋企人分享我做緊乜嘢，壓力真係好大」。外表嬌滴滴，說話柔弱無力的吳嘉怡（Katie），她選擇幫助妓女，原因是「想陪佢哋行呢條路」。
記者：楊淑華 羅鈺歡 攝影：陳家紹 鄧振權
這一天，記者陪着Katie開工。她孭着一大袋KY潤滑劑、避孕套，手執一份大堆骨場、桑拿浴室地址門牌的清單，向油麻地廟街一帶進發。來到第一個「目標」，大廈入口當眼處掛着「XX賓館」，右邊則豎立了一個三呎高的燈箱，Katie氣定神閒走進去，準備向性工作者派發物品和傳單。
作為助理項目主任，Katie除了為性工作者籌辦各類活動外，更會到不同的色情場所，了解她們面對的性病及健康問題，還會即場為她們進行愛滋病毒測試，工作中最多接觸的對象是「一樓一」。
立志陪着妓女走
Katie在大學主修社會工作系，偶然上了一課「性別議題」講座，內容提及社會對性工作者的各種不平等對待，她深受感動。當時她已立志畢業後為本地性工作者服務，此後她果然加入青鳥當社工，至今已兩年了。
「絕大部份性工作者都唔敢俾家人知自己做乜嘢工作，可想而知佢哋壓力有幾大」。Katie感同身受，原來作為社工的她，一樣飽受家人的反對壓力。「屋企人極之反對我做呢份工，爸爸更加完全唔知我份工做啲乜嘢，媽媽就算知道亦唔支持，覺得點解我成日要出入啲咁污糟邋遢嘅地方，不斷要我轉工」。
新移民來港的鳳姐KK，便視Katie和一班社工如同恩人，「呢樣（提供性服務）係我第一份工，有次警察嚟查牌，嚇到我唔敢返屋企，但Katie同我講我有香港身份證，叫我唔使怕」。除了維權，Katie甚至替妓女開辦英文班。「Katie畀咗啲英文生字單張我貼喺屋企背，一句hello、yes等等，外國客聽到已經好開心，起碼有交流，生意都多咗。」KK邊說邊笑。
Katie也笑着回應，並以靚女來稱呼KK，她告訴記者，細節如稱呼，也是對鳳姐的一種尊重，如此才能「陪佢哋行呢條路」。