立法會環境事務委員會本周一啟程去南韓，考察當地廢物管理經驗。香港搞環保，遇到唔少阻力，有份去南韓取經嘅新民主同盟范國威話，有議員問零廢運動網絡嘅秘書長金美花，點解南韓可以通過一啲令市民不便嘅環境法例，唔通政客唔驚得罪選民冇運行﹖金美花竟然話，關鍵在於「民主」，因為南韓自從民主化後，民間團體更團結爭取政治支持。八方聽聞自由黨張宇人聽完都笑笑口話：「咁香港要先有民主、先搞環保喎。」
呢次南韓之旅，議員周一抵埗時已經天黑，所以行程首站係食石頭飯醫肚，跟住自由活動行夜市；民建聯陳克勤第一時間去超市買牙刷同牙膏，皆因酒店冇提供。