昨日A股再跌，港股彈唔起即刻洗倉，但跌得多嘅主要係業績股，包括內銀股信行（998）同民行（1988）、機械設備股中聯重科（1157）、汽車代理股正通（1728）等，撇除績差股其實唔算洗倉，甚至唔少股有本事爆升，例如舜宇光學（2382）、天虹紡織（2678）之類，就咁睇，港股市底已經較前排跌市改善。
藍籌方面，近排本地地產股有轉強之勢，但回想前排受到美元強勢、資金流出香港嘅困擾，本地地產股曾經跌得較急，晉佳當時亦睇得比較淡，但時至今日，恒指成份股喺海軍鬥水兵之下，原來仲有內銀股衰得多，而本地地產股去年業績實在係理想，所以開始變番做資金避難所，基金亦死死地氣買番本地地產股去撐住恒指。
手頭農地料加快批補價
對於本地地產股，晉佳唔算睇得特別好，不過，恒基地產（012）可以當係一個特殊例子。前排恒地股價升得多，主要因為主席李兆基同政府傾好捐農地，將會私人從恒地買入一批雞肋農地捐畀政府，當然，四叔一向無寶不落，咁好死捐地實係有後着，市場估計，個別保持喺上市公司嘅靚農地，有機會開綠燈加快批補地價，然後起樓賺大錢，對於恒地同政府嚟講，都係雙贏結果。
新世界發展（017）主席鄭家純為梁營站台一幕，相信大家仲記憶猶新，之後股價遠遠跑贏同業，就知道同政府有偈傾嘅重要性。
恒地可以同政府有deal，有政治因素支持業務前景之餘，更重要係恒地大把農地喺手，等住補地價，他朝受惠政治因素嘅條件，比起新世界更實在。
以前大家覺得恒地批農地睇怕N年都傾唔掂補地價，所以當地皮有等於冇，𠵱家有機會由冇變番有，淨係一份憧憬都值得股價出現強勢，而市賬率0.7倍亦夠平。走勢方面，恒地捐地後股價爆升，但呢幾日港股低位有餘震，恒地股價仲係頭也不回，證明夠強，後市仍可看高一線，現價追入，中短線先睇60蚊。
晉佳
本欄逢周一、三及五刊出