北京長安街將會有條友裸跑？！話說深圳英聯不動產董事長兼經濟學者郭建波，舊年無端端喺微博同華遠集團總裁任志強打賭，指今年三月內地一線城市樓價唔跌嘅話，佢就會喺長安街裸跑十公里，佢早前喺微博認輸，仲話要向有關方面申請裸跑喎。
郭建波話，應該以統計局公佈嘅70個大中城市房價數據為準，雖然呢個數未出，但坊間已有數據顯示，北京、廣州、深圳嘅房價環比升逾2%，佢惟有提早認輸。
郭建波舊年估今年3月一線城市房價下跌，都唔係毫冇根據，佢認為內地經濟增長放緩同調控政策會影響樓市，可惜內地樓市同香港樓市差唔多，政府點出招都冇用，樓價依然唔捨得跌。
可惜郭建波只係喺北京裸跑，港人冇得現場打氣，唔知本港有冇名嘴敢打呢類賭注呢？