要數港人至like嘅消遣娛樂，麻雀一定上榜，政界內亦有唔少雀后，好似唐媽媽尤淑圻、陳方安生同李麗娟，閒時都鍾意搓吓麻雀過日辰，據聞牌品同牌技都唔差㗎。查實八方好想推薦佢哋參加6月喺澳洲舉行嘅世界麻雀大賽，事關過去三屆嘅麻雀王寶座都由港人包辦，但個個係男性，未有雀后誕生。
冠軍獎金三百幾萬港元
闊別三年嘅世界麻雀大賽今年復辦，由澳洲麻雀協會全權負責，6月2號開幕，3、4號比賽，大會估計全球有15個國家及地區共數百人參加。比賽場地就由澳門轉去澳洲悉尼嘅賭場The Star，大會話如果超過500人參加，獎金會加碼。
雖然參賽費要近1.9萬（港元，下同），但只要打入頭64名，就可以得到約兩萬蚊獎金，算回到本。頭兩屆冠軍有成390萬獎金，但第3屆冠軍獎金開始縮水，今屆則有38.8萬澳幤，即約315萬；不過總獎金就創新高達812萬。過去3屆冠軍得主噚日都話，已經用晒啲獎金去買車買樓或結婚生仔，蠢蠢欲動想再落場；年屆69歲嘅首屆冠軍許宗澧聲言若然自己唔得，「就搵太太代我，我會訓練佢」；第二、三屆冠軍何國雄同陳德群都話，邊度打牌都係其次，最重要係夠運。
比賽會以淘汰賽形式打六個回合，打「新章」，唔打花，用計分制；康泰旅行社會協力，參賽嘅5日團盛惠9,999元，8日團則係14,999元，唔包參賽費。有興趣參加嘅雀王雀后，可以到 http://www.wsomaustralia.com.au網站瀏覽詳情。
mailto:[email protected]