貨櫃碼頭工潮接近一星期，仍未有解決迹象，碼頭公司嚴姓發言人，每次出場都令人火滾，開口埋口碼頭安全，大佬，扮嘢都要扮身水身汗去同分判商斡旋，前線採訪記者對呢位嚴先生討厭到不得了，有如此水平發言人，即係變相幫工人造勢。
近年低薪及勞動力密集工種，都要面對分判制度剝削，上巿公司也好，政府機構或法定機構也好，都採用外判方式，一來揸數容易，價低者得，又唔使負責MPF、長服金等福利，二來有乜工潮就立即劃清界線，聲稱工人的工資水平是分判商內部事務，碼頭公司概不負責。但外判係咪真係可以令公司將責任推得乾淨呢？非也，好似今次碼頭工潮，工會及工人最終會算到大老細李超人頭上，一樣會去長江中心抗議。
應效法房署 監察分判商
03年公屋接二連三出現大廈鋼閘鬆脫事故，因房署將公屋維修管理外判，承判商為低價中標節省成本，不惜裁減資深員工，令服務質素下降，起初房署一樣卸責予外判商，當時署長梁展文表示工作可以外判，責任不能外判，最終房署也要承擔監管責任，贏得輿論支持。房署外判工作眾多，但已建立一套監管方式，對剝削工人的清潔公司，實施黑名單制度。
同樣國際貨櫃碼頭公司，最終也無法逃避社會責任。正如美國Nike外判生產工序到東南亞，分判商用童工或血汗工廠時，總公司能置諸不理？肯定俾傳媒及消費者組織插爆，發起罷買時，將損失慘重。舊年Apple外判代工生產的台灣富士康（2038）在內地工廠出現多宗工人自殺事件，Apple要立即同富士康商討改善內地工人待遇，唔通Apple可以將責任全部推到郭台銘身上？
當企業大到某一個size時，老細唔可能當自己仲係一個純粹生意人，佢必須要負起企業公民責任。用大量外判工，價低者得方式來揸數，外判商盈利方式只有一途，就係向下剝削，變成血汗碼頭，碼頭公司又點能夠甩身，話唔關自已事？
私人企業應該效法房署做法，建立分判商計分制，每次招標必須考慮分判商往績，而非只考慮標價，價低者得，同時要成立專責部門去監察眾多分判商，甚至可以同工會合作。
據《紐約時報》透露，舊年Apple將企業社會責任部門規模擴大三倍，並且重新評估了與製造商的合作方式，向富士康施壓，同時一改態度，主動接觸勞工維權組織如FLA，由FLA去調查富士康。Apple整頓中國代工工廠行動，也令Intel、Gap、Patagonia等大量在中國採購大企業跟從，由中介組織去調查中國代工工廠之工人處境。內地富士康工人工時過長問題同Apple關係，比國際貨櫃碼頭與分判商關係更遙遠，Tim Cook大可以話我只係採購富士康製品，佢哋工人待遇、工時過長與我無關！
添馬男