稻香集團今個月重推「壹蚊雞」優惠，食客可以用優惠價0.5元半隻、1元一隻食雞。原來稻香去年嘅「壹蚊雞」活動，賣咗成49.5萬隻雞，唔知今年會否創新高，但肯定惹嚟唔少大胃王挑戰。
有市民喺網上展示舊年「戰績」，一次過點咗八隻「壹蚊雞」，仲話今年要再接再厲再挑機，點知呢番豪言惹嚟唔少網友批評，話咁係浪費食物兼晒命喎。
自稱貼圖貼文嘅周先生主動同八方講，當日同成班老友放工排咗一陣隊先有位，而且唔係淨食雞，叫咗小菜同一煲湯，埋單成兩百幾蚊，咬開有血有肉，最重要係食得晒，冇嘥嘢喎。稻香發言人就話「壹蚊雞」無上限可任點，食唔完亦唔會另行收費嘅。