賭王何鴻燊三太陳婉珍06年開始做東華三院總理，08年任副主席，今年終於升呢主席做正印。雖然賭王冇現身捧場，但超雲就單拖出席賀媽咪，三太話佢一早向賭王滙報喜訊，賭王不知幾開心，遲吓會同佢食飯慶祝㖭﹗
做咗主席後，三太肯定冇咁得閒，佢諗住呢一年要幫東華做多啲長者醫療服務，但講到明會盡量抽時間陪賭王。至於三個仔女，三太話佢哋大個嘞，毋須太操心，好似做會計嘅細仔何猷啟，早兩日已經飛返倫敦開工。
話時話，賭王四太梁安琪家吓做緊保良局董事會第一副主席，如無意外下年輪到佢升呢做保良局主席，屆時咪可以喺慈善界同三太睇齊囉。