雲想衣裳：環球Shopaholic　網中人格言　忍

網購風行，由九十年代網上商戶出現，到近年盛行的淘寶也風靡網民。這種一按即買的網上消費模式，再不單純地硬銷足不出戶買遍天下的好處，更便捷的是簡單輸入一個關鍵字，就可以即時搜尋到針對性的單品，新時代的消費模式將翻天覆地般改變，我們要向網購老手學習，懂得忍耐與格價，才是王道。

記者：陳子穎

攝影：陳永威、潘志恆、陳盛臣

Designer Labels平過專門店

當網上消費模式還未開始顛覆傳統的消費模式前，從事律師的Blanche早於10年前已開始上網Shopping。網上消費同傳統消費的比例是8:2，絕對有資格稱得上是網購始祖。當初Blanche還是新手時，會在shopstyle.com輸入關鍵字搜尋自己想買的貨品，買慣了就已經可以即時聯想到光顧哪一間店。「呢個網站最方便之處是只需要輸入想買的貨品，就會一次過List出可以買到的網站，然後你可逐個Click入去比較，因為好多時同一件貨每間店的價格及運費也有偏差，所以千祈唔好心急，要忍一忍手。」
她坦言網購以來從未有過不快經歷，心得是只會光顧外國大型網店如NET-A-PORTER及ASOS等，更特別鍾情Designer Labels，「買大牌的Hot Items，一定要揀大型網站，款式夠新又夠齊，好多時在專門店排Waiting List都未必買到，但網購就即刻有，且貨品連運費有時比專門店更平。」

先淘後加工

「因為學識游水，為了獎勵自己上網買了一條低腰泳褲，從此愛上網購！」時裝設計師陳刀向來不甘平凡，由個人形象到幫Artists、企業搞包裝，都喜歡先淘後加工。「2006年我喺日本讀書時，已經開始網購，那時剛學識日文，買嘢都方便啲！不過，買上癮都係近幾年嘅事，完全是為了方便工作。通常我會在淘寶買一些Basic Material，然後再加工，仲方便過搵現成小道具。以前單單是找小道具已花了很多時間，現在喺淘寶打幾個字，就有幾百種畀你揀，仲送埋上門。不過網購係就係好方便，但原本你可能只係想買一樣嘢，但見毗鄰的圖片或字眼吸引，就會忍唔住Click入去，最終買咗好多嘢！所以現在我會盡量克制自己，先將想買的東西放在『Basket』，考慮一晚，真係覺得有需要和超鍾意先買。」

加肥加大無有怕

身形肥嘟嘟的人向來買衫唔容易，其實肥人都好貪靚，只是門路不多。好似細細粒，在淘寶未出現前只會找專人做衫，但現在只需輸入「加肥、加大、寬鬆」等字眼，就可以搵到她的心水服飾。細細粒揚言淘寶的出現，簡直是幸運星，「基本上我由內到外都喺淘寶買，好似打底背心、外套、連身裙，有幾個XL Size畀你揀，有時買最大的仲有寬鬆位，哈哈！好耐都未試過有呢種感覺。除了衣服，我都會買少量日用品，例如汽車用的GPRS、小狗用的剪髮器等，但鞋就不一定會買。」

買鞋惹的禍

腳大都是煩惱，正常要着45號鞋的志偉，喺香港成日都要逼住買44號鞋，着到腳趾都變了形。直至兩年前在工作時和記者談起此事，記者介紹了一個英國網站size?給他，從此買到鞋，解決了腳大的煩惱。不過頭幾次網購，就不時遇到買錯Size的情況，令他覺得患得患失。