一個政府窮途末路時有乜嘢徵兆呢？就係當自己人都咬實嚟鬧嘅時候喇。財經事務及庫務局早幾日宣佈收番《公司條例》涉及董事住址同身份證號碼嘅附屬法例，今年之內都唔會上立法會，工會同記者團體聽到當局唔再「多嚿魚」，個個拍爛手掌。
不過呢，曾經講過原有安排並冇違反《個人資料（私隱）條例》嘅私隱專員公署，似乎條氣就唔多順，噚日仲突然高調出稿，話對政府嘅決定好失望，大鬧政府原地踏步，唔可以接受，仲發爛渣批評過去幾個月嘅諮詢反應太過一面倒，吹雞呼籲人權倡議者同專家多啲發表意見，到底呢鋪純粹係私隱專員蔣任宏想威風吓，定係佢好唔妥「儍強」甚至梁班子要發爛渣呢？真係不得而知喇。