亞視一直拒絕承認無綫沿用開、市場又當係指標嘅收視調查報告，亞視前年開始自己搵咗香港大學用電話抽查方式統計收睇亞視嘅收視，仲強調亞視嘅觀眾係逾百萬計，同無綫係有「四六之比」。原來奇蹟唔止喺聖誕節至會有，復活節都有意想不到嘅事發生㗎！
噚日無綫公佈嘅收視報告中，亞視所講嘅四六之比真係出現咗，喺上周六嘅六點鐘時段，無綫重播鄭丹瑞喺古巴拍嘅《向世界出發》，只得平均4點收視，但同時段亞視嘅《六點鐘新聞》就有6點，真係做到四六之比呀！翻查紀錄，原來自今年1月起，亞視喺逢星期六嘅呢個時段，收視都同無綫拉成均勢有4點，但2月16日後就起咗革命，慢慢變成5點贏無綫1點，到咗上周六更加做到「四六之比」，夢想成真呀！唔知亞視會唔會選擇性信呢個調查呢？
劇集冇得比
不過喺其他時間，無綫都係贏到離行離列，《女警愛作戰》及《仁心解碼II》分別有平均28點（觀眾人數180萬）同27點（觀眾人數173萬），齊齊升咗1點，完全冇受假期影響，唔算特別好，不過亞視肯定冇得揮！
版主：陳基征
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/