【肥上瘦下】
10年來碼頭工人薪水不升反跌，嚴磊輝昨日在電台拒絕正面回應自己過去10年有否加人工，不過翻查紀錄，10年來三度轉職的嚴，原來年薪已大增了近三倍，平均月入百萬元。
2011年年薪逾千萬元
嚴磊輝昨接受商台訪問仍不改「寸嘴」作風，令休假中的節目主持李慧玲都忍不住要phone-in與他對質。問到他是否能接受碼頭工人的薪酬待遇時，他就圖以「行業不同」解釋，指貨櫃車司機轉行做的士司機，收入都會減少；李追問他過去10年薪金升跌，他拒絕正面回答，只稱自己轉過工，暗指任職投資銀行時收入更高，「你知唔知我搵幾多錢呀嗰時？」
嚴過去十多年多次轉職，01年擔任星島集團聯席行政總裁兼執董，年報顯示他當年年薪介乎3至400萬元；03年加入和黃貨櫃碼頭，負責美洲、中東和非洲貨櫃碼頭業務；09年加入希慎興業，一年後任行政總裁兼執董，11年年薪連花紅已達1,162萬元。
嚴磊輝惹火言論
論與工人關係
「嗱！我再講多次，我哋唔係今次呢個訴求嘅資方，資方係佢哋幾個承辦商，我哋係承辦商嘅客戶。」
論工作環境
「碼頭梗係唔係舒服行業，但係有幾辛苦有乜嘢可以改善，其實我哋好有興趣理解；但一講到錢就唔係我哋同員工嘅問題，係佢哋同佢哋老闆嘅問題。」
「喂！勞工處死㗎？勞工處要做嘢㗎嘛，點解唔搵勞工處投訴、點解搵我投訴呢？咁你即係話政府冇用啦？」
論工人薪酬
「如果佢覺得雖然好辛苦、雖然要做24小時、雖然要輪班、雖然要風吹雨打，不過咁嘅情況下呢個價錢可以接受，咁佢咪繼續做落去囉。」
論罷工
「（罷工）影響嘅係整個香港航運業，再係咁落去，坦白講，冇得撈㗎喇。小心啲，唔好打爛自己、所有人飯碗啦！」
「我要再講，貨櫃車係好危險、好大型嘅機器，你擺隔籬瞓、喺度露營咁，貨櫃車一個唔覺意行埋少少，我就……就好難講。」
「個官已經判咗，佢做任何嘢違反個官判嘅，就係藐視法庭，咁後果佢自己負責。你試下個官叫你唔好做你去做吖，入去坐兩個星期都唔定㗎！」
《蘋果》記者