減肥唔係女人先啱，男人都好有市場。財經圈裏面，除咗和黃（013）大班霍建寧同名燈股評人孫柏文瘦身成功，向來噸位十足嘅立法會金融服務界議員張華峰亦一直有個減肥夢，可惜仍然喺發夢階段，各纖體公司不妨度個減肥療程畀張議員，事成嘅話，慳番好多廣告費！
張華峰原有260磅，舊年中為參選立法會，日日風塵僕僕洗樓拉票，輕鬆搣走30磅，可惜立法會生涯唔係咁簡單，日日坐喺度開會，不時同人食飯摸底，肥膏輕易番晒嚟。
劉長樂做人辦推介
噚日同張華峰食晏，佢話身型弗晒嘅鳳凰衛視（2008）主席劉長樂，早排介紹佢北上深圳參加一個減肥療程。經減肥醫師診斷，張華峰之所以咁肥，原來係消化系統運作得唔暢順，搞到食物積晒喺體內，久而久之就變成𠵱家咁樣。同好多女人一樣，張議員聽見醫師咁講，即刻放低五萬大元買個瘦身療程。呢個療程唔係用啲乜嘢高科技推脂，只係用傳統方法，拔罐打通淋巴穴位，幫佢打通消化系統，再配合均衡飲食去瘦身。
張華峰最初好勤力咁北上做咗十幾次療程，感覺良好，可惜之後分身乏術，冇時間北上，搞到前功差唔多盡廢了。𠵱家惟有睇吓有冇纖體公司能夠為呢位大忙人，度身訂造一個減肥療程啦。講到尾，減肥要持之以恒先得。
人辦劉長樂
劉長樂較早前跟唐英年一齊當選香港區政協常委，反映佢喺政經兩個圈子都長袖善舞，身型弗啲係咪更加有利呢？佢可能見張華峰舊年當選立法會議員，開始從政，都要執一執，先至介紹佢北上減肥。
李華華
mailto:[email protected]