快餐股龍頭大家樂（341）噚日高調宣佈，請咗4As廣告公司麥肯香港（McCann）幫佢哋度橋諗新廣告，同合作咗差唔多十年嘅Bates CHI（達彼思）分手。
貫徹務實作風
麥肯有唔少大客，據聞國泰航空（293）都有用佢，近期最受注目嘅廣告，就係寶光（084）旗下鐵達時嘅「愛你100年」廣告，呢條廣告令到唔少人睇到眼濕濕㗎。成日話要「做足100分」嘅大家樂突然轉廣告公司，唔通想畀夠300分大家？
大家樂發言人就叫大家唔好諗得太多，肯定唔會整條鐵達時咁款嘅動人廣告片。今次換廣告公司，純粹係同之前嗰間合作太耐，覺得係時候轉，希望擦出新火花。未來嘅廣告方針，繼續貫徹佢哋嘅務實作風，主要都係介紹新產品同優惠，最多加入些少人情趣味故仔咁咋。