近排搵食艱難，指數表面冇乜事，但股仔就跌到五癆七傷，中資股更現信心危機，新能源概念早排炒得火熱，但賺唔到錢最後都打回原形，傷透股民心，股價應該有排翻唔到身。
淡市冷吼，不妨揀隻「十年唔炒一次」的路訊通（888）。各位如搭開九巴，對此名應不會陌生，但隻股有何吸引力？唐牛總結為五點：業務簡單、息高、財務穩健、走勢強，以及政策風險低。路訊通主攻九巴車身及車廂內廣告，簡單易明，算是畢菲特口中的「傻瓜也能管理的公司」。去年經營溢利9,650萬銀，增長22%，資本開支低，可以賺幾多派幾多，息率6.5厘，相當吸引。
財務方面，公司現金近4.1億銀，為淨現金公司；最近更將5.3億股份溢價賬轉撥至實繳盈餘賬，令日後派息率可高於100%，更可能派發特別息。此外，路訊通純為本地概念，受內地政策影響近乎零。走勢上，該股近日成交大增，昨突破八年高位，向03年高峯1.40元邁進。
唐牛