咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【咖喱篇】上月底，俄羅斯富商別列佐夫斯基喺倫敦神秘死亡，睇落同足球扯唔上關係，但睇番啲報道，原來佢係車路士班主阿巴莫域治嘅恩師同埋敵人。小弟研究吓佢哋嘅往事，發現阿巴係個好叻嘅人，喺風起雲湧嘅俄國政商界屹立不倒。講到玩政治，喺阿巴眼中，摩連奴同泰利真係小學雞都不如。
阿巴28歲嗰陣，發蹟咗冇耐，但佢冇少年得志、語無倫次，反而謙卑求見度緊假嘅別列佐夫斯基。別列嗰陣係俄國商界巨擘，仲係葉利欽背後嘅支持者；佢好欣賞細自己廿年嘅阿巴，覺得佢係個醒目仔，態度又好，所以就收佢做徒弟，仲將阿巴介紹畀葉利欽。
阿巴深知佢嘅老細係別列，而唔係葉利欽，所以佢向師父別列獻計，夾份吞咗俄羅斯嘅國營石油公司。阿巴叫別列說服葉利欽整合國內石油公司，同埋向資本家招標，當然阿巴同別列順利投得；佢哋就借錢俾國營石油公司發展，同俄國政府講，如果政府唔還錢，就要拎石油公司嘅股份嚟還。結果喺97年，俄羅斯冇錢還，阿巴就同別列一齊吞咗間國企。30歲嘅摩連奴喺巴塞做翻譯同助教，頂多諗吓計買人，度吓戰術，但阿巴已經運用政治手腕，將俄國政商界玩弄於股掌中。
之後，阿巴繼續做別列嘅軍師，兩師徒拍住搵食。別列發現葉利欽年老多病，加上又有醜聞，所以提拔普京做接班人。別列希望幕後控制普京，繼續做俄國政商界嘅教父，但阿巴睇得好清楚，普京唔同葉利欽；而兩師徒亦喺呢個時候分道揚鑣。文：咖喱