好鍾意工作嘅香港首富李嘉誠，早排叫人唔好再問佢幾時退休，今年只得48歲嘅阿里巴巴集團董事長馬雲偏偏相反，開口埋口話要退休，仲話工作快樂就得，唔使太認真。對於一班爭取加薪嘅碼頭外判工人，退休同工作快樂似乎係外星話。
會產生壓力同抱怨
馬雲喺「2012福布斯中國富豪榜」排第11位，佢早前出席一個研討會，大談工作之道，佢應該好認同高登仔最鍾意講嘅一句「認真你就輸了」，建議大家工作唔好太認真，認真只會產生更多壓力同埋抱怨，佢亦好討厭認真工作嘅人，認為工作快樂先至重要。
查實邊位唔想工作快樂？最好梗係搵到份自己鍾意，又做得合皮嘅工作，但呢個世界邊有「半斤八両咁理想」？如果呢個世界咁理想，直接間接幫緊超人打工嘅碼頭外判工人，就唔使為咗爭取加薪日以繼夜，夜以繼日咁冒雨瞓街啦。