人稱「沈大師」嘅明燈股評人沈振盈，上季戰意高昂咁參加《爽報》「300萬爽組合」，可惜季結時連肥佬黎一蚊都贏唔到，成績只算冇輸冇贏（微賺0.17%），搞來搞去得個桔。但佢冇被打沉，復活節長假過咗大海搏殺，仲喺呂志和個賭場贏番筆旅費。
陸叔同場碰運氣
上周六中午喺澳門銀河酒店個賭場見到沈大師，佢一支公喺度玩電子花旗骰，見佢一身便服，着住條三間牌子運動褲，頭髮都冇蠟起，明顯係一個輕鬆放假look，唔係被賭場主人家邀請去巡視人哋業務。
沈大師話，每逢有三、四日公眾假期，好似過年、聖誕、復活節長假，佢都會同沈太過大海玩幾日，由於佢哋去到賭場就各有各玩，所以華華見唔到沈太蹤影，當日另一位股評人陳永陸「陸叔」亦喺呢個場出現，但見佢好趕時間，一個閃身已消失於人群中。
袋走呂志和幾千銀
照沈大師所講，佢應該玩過晒澳門各大賭場，以後搵人評澳門酒店同賭場質素，一定要搵佢先得。佢最近就覺得喺銀河酒店賭錢最「就手」，大致都係手風順嘅意思。佢唔肯講今次贏幾多，只係話賺番房租、船飛、使費咁話，咁即係起碼贏走呂志和幾千銀啦，贏唔到肥佬黎，贏番呂志和都係好嘅。
正所謂有賭未為輸，沈大師以上季排第三嘅成績，今季可以繼續玩「爽組合」，佢打算主力炒市、炒輪，即係話，如果股市行單邊市，佢又買中嘅話，就有機會贏，睇嚟佢鍾意賭大細至真。
李華華
mailto:[email protected]