泰國Ａ回港飲喜酒，匆匆到中環找左丁山飲茶，大家相約到翠華茶餐廳見面；泰國Ａ樣貌好開心噃，成個人逢喜事精神爽咁款，佢個大女出嫁時，回港擺酒都唔見佢笑得咁開心。問佢是否因為泰國股票創十九年新高，賺咗大錢，泰國Ａ答：「冇啦，泰國炒股幾難賺錢，消息好多嘅。只係今年開始，我開始放下擔挑，兩個女可以獨立自主嘞，我雖然唱慣校歌千斤擔子兩肩挑啫，能放下重擔，如釋重負，輕鬆舒服晒。」
聽佢解釋，大女在布朗大學畢業，跟教授去咗普渡大學讀博士學位之後，已經完成學業，跟住到紐約市政府搵咗一份合約工，雖然人工低（按：讀環境科學博士似乎時興，但在美國搵工好難），已經開心，至於是否搵得番留美十年之學習費用，已是另一回事，好彩大女丈夫係哥倫比亞大學數學博士，去年由一位低薪助理教授變身為對沖基金僱員，收入大增，兩口子頂得順紐約之高昂生活費用。
二女在美國讀醫，已得哥倫比亞大學MPH（公共衛生碩士），但最刺激就係今年三月十五日真正得到確認，今年年中可以到紐約長島一間醫院做實習醫生，預期兩年後成為有牌醫生。二女又係留美十年，大大話話用咗泰國Ａ起碼五百萬港元去交學費及生活費，三十歲先至可以成為醫生，十年內希望成為專科醫生，即係話假如一切順利嘅話，美國醫生要到40歲後先至可以搵真銀，供書教學嘅父母千萬不要望有回報，以投資回報計，泰國Ａ嘅二千金如果老早在中學畢業後用Non-JUPAS成績返香港讀醫科，出身快好多，費用平好多，搵錢搵得多啦，在美國讀醫科，時間漫長，費用大，父母少個崩支持都唔掂，最慘就係經過四年醫科前（pre-med）、四年醫學專科、兩年實習之後，成為醫生，仍然冇資格返香港行醫，因為香港醫學會認為香港醫生醒啲，叻啲！泰國Ａ話全美每年有二萬名醫科畢業生，加埋起碼二萬個國際醫科生爭奪全美二萬六千個醫院實習名額，美國公民多數得到，但入邊間醫院就要透過聯招方式（2012年經濟學諾貝爾得獎人Alvin Roth, Lloyd Shapley發展出來嘅理論與方法）配對。泰國Ａ在三月十五日之前緊張到不得了，後得知女兒中咗第一志願到紐約，年薪六萬五千美元，自然喜出望外。