八方知道好多人都忘不了周一嶽嘅歌喉。憑一曲《忘不了你》紅遍網絡，點擊率直逼雙白金嘅周醫生，噚日履新任平機會主席，下午佢出席大愛同盟成立音樂會，主持介紹佢出場時，唔少粉絲已經大嗌「唱歌！唱歌！」，熱情程度可媲美黃耀明同何韻詩。周主席可能冇諗過自己咁受歡迎，居然有少少面紅。
歌喉有進步
周主席講完一輪支持同志平權後，又話好欣賞出席在場嘅歌星，此言一出，粉絲再瘋狂大叫「唱歌！」，就連主持梁兆輝都加把口話：「周生唱歌嘅點擊率好勁㗎」。剛上任嘅周主席果然聽民意，上台合唱一曲《Amazing Grace》，佢雄渾嘅聲線勁爆全場，抑揚頓挫，唱到喉核都震晒，有人話佢似莫華倫。
梁兆輝仲話，第時大愛同盟籌款，一定要搵周主席唱番兩嘴，肯定籌到唔少善款。冇見一排脫胎換骨，再唔係以前嘅技安歌喉。周主席同八方講，一路都有唱歌，不過唔係唱流行曲喎，「我唱開意大利歌劇」，真係失覺晒。佢仲話中學時係合唱團，專唱男中音、男高音咁話。