中聯辦將喬主任較早前對保皇議員的「重要」講話全文發表，而其中「重中之重」的壓軸言論自是再三強調：在一國兩制下，香港行政長官普選是有前提的，就是要符合基本法和全國人大常委會的有關決定，另一個前提就是不能允許與中央對抗的人擔任行政長官。若這兩個前提不確立，得不到香港社會多數人的認同，是不適宜開展政改諮詢的，縱使勉強進行諮詢，也不會有好結果！
最後那句形同恫嚇，也怪不得偽首近月仍堅稱有足夠時間就普選進行公眾諮詢，因為就算有諮詢都只需虛應敷衍一下，事關按照喬主任意思，港人一日唔叩首表達甘於逆來順受、退而求次嘅民意，一日都唔使傾。面對如此霸道的姿態，難得我們尊貴的行會召集人，還講得出政府會「真誠、開放同兼聽」咁進行諮詢，有此誠意，你又唔走去同喬主任講？不過打從閣下欣然接受委任進入行會，棄「平機會」如履，捨節不保，我們又怎能相信先生仍會為民而爭。再而拋出甚麼在政改路上「協商和妥協實屬必然」的忠告，更是擺明繳械投降。
虛有其表 不如罷了
總之呢啲先設套，再嚟扮晒認真搞大龍鳳嘅玩法，我們領教了這麼多年，若還抱有希望，真係冇得救，雖然亦都仲係有啲「民主大黨」同「民生小協」樂此不疲。連諮詢都要講前提，咁行政長官候選人竟會冇先決（被篩走嘅）條件，咪就係癡人說夢囉！說到底，專制政體怎會容得下民主當家，搞咁多嘢，傳咁多話，無非想我哋死咗條心。舊年假戲真做嗰套「狼英鬥豬年」，糟透劇情雖似不可收拾，但始終都只係自己友喺度爛鬥爛。始終雙方都係中央首肯嘅人物，即使係互相殘殺，窩裏權爭都不過是「內部矛盾」。
惟「尚民為主」並意圖挑戰獨裁政權者，只作敵扮，因為沒有民意授權的執政團體，最忌諱的也就是民眾力量，彼此共對又怎會不是「敵我矛盾」？所以喬主任先會話視對方為對手，只有你死我活。其實那些所謂「搞對抗的人」，到底憑甚麼可以「對手」自居，走去抗衡一個龐大的國家機器？如果真的要在絕地還生（還不是「還擊」呢），惟有寄望群眾有最後一絲的醒覺，那些裝模作樣、虛有其表的諮詢，算了吧。
普世平等的選舉，就似自由的戀愛，今時今日應該冇人唔明係乜意思，除咗你個專斷橫蠻嘅老竇，所以佢話會搵定兩個世叔伯嘅乖仔畀你揀嚟做老公，雖然一個有時可能逢場作戲，另一個間唔中弄虛作假，而你鍾情隔籬屋嗰個就一定唔使諗，因為佢成日都頂撞你老竇！不過為咗尊重你嘅意願，所以令尊話會喺親朋戚友圈中搞個廣泛諮詢，再睇吓用乜方法名正言順咁揀嗰兩個乖女婿出嚟。縱使你唔離家出走，咁點都要企硬表態大叫「唔好」，係嘛？
盧先亞