騰訊（700）CEO馬化騰雖然N次澄清微信唔會收費，仍不斷被電訊商圍攻，指微信令數據負荷過重，想逼佢收錢，搞到個個認定微信收費日子不遠矣。
數據資源用多咗，其實電訊商可以透個唔同途徑控制，好似月費計劃、限速等，點解偏偏要矛頭直指微信。好明顯流量過大只係藉口，真正理由係電訊商眼見微信用戶急速膨漲（兩年用戶數目已達三億），少咗人用短訊，自己業績差咗，騰訊整咗嚿肥豬肉出嚟，自己冇份食，唔嬲就假。
不過計計數，就算微信收費，用戶都可以轉用其他免費apps，總之唔會用短訊。而且馬化騰又唔係開善堂，終有一日會將微信商業化。市場預期，騰訊會好似另一個手機社交app 「Line」咁，推出收費遊戲，到時人均用量會進一步增加，對電訊商有利，所以電訊商明顯係巧立名目搵水抽。
咁要騰訊向用戶收費又的確冇乜可能，就算收錢，都只係電訊商向騰訊收，所以，各位用戶唔使擔心。
Fifi
本欄逢周二、四刊出