見到工行（1398）以每日賺6.5億元（人民幣．下同）蟬聯全球最賺錢銀行，中移動（941）的淨現金水平已達Apple的一半，你以為國企在壟斷優勢之下，全都天下無敵？上星期就出現咗兩隻可能係史上最敗家的國企──中遠（1919）和中鋁（2600），去年分別勁蝕96億及82億元。其中中遠已輸過阿爺三年錢，兩間國企加埋累蝕超過350億元。除咗賴市場環境唔好之外，佢哋搞到咁嘅田地，自己都有好大責任。
首先係中遠，喺08年嚴重睇錯市，在波羅的海指數（BDI）升到7000高位時，唔單止大肆擴充運力，仲訂立大量遠期運費協議（FFA）好倉，簡單嚟講，即係豪賭運費會繼續勁升。最後現實係，金融海嘯打擊貨運需求，加上運力過剩，BDI跌到𠵱家只有910。所以搞到中遠連年捱貴租不特止，𠵱家都仲要為合約book緊逾14億虧損。公司除了賤價賣產救亡，已別無他選。
至於中鋁，雖然鋁價長期不振，加上印尼限制鋁土礦出口，的確打擊好大，但海迪一見到佢總債務去年又爆升至1,045億，單係畀息都嘔咗49億！海迪懷疑佢呢一世都唔會還得清啲債。冇紀律地擴產搞成咁，一心等阿爺打救罷啦。
海迪