所謂三軍未動，糧草先行。為咗支持碼頭工潮，熱心嘅市民送嚟唔少糧草，支持工人打呢場硬仗。
碼頭工人冇乜嘢特別技能，最叻就係搬貨、入貨、出貨、做物流。所以為咗管理好各方送嚟嘅物資，工人將平日做物流嘅技巧大派用場，將物資分門別類。八方喺碼頭所見，市民煲嘅靚湯、提神咖啡最多工人like，生果就冇乜人吼。
至愛咖啡 唔食生果
工人強哥同八方講，由工潮第一日開始，無論欠缺乜嘢，只要託人喺facebook稍為呼籲吓，物資就會源源送上。現場所見，你噏得出嘅乾糧同飲品都有。由餅乾、麵包、薯片、喉糖、朱古力蛋糕、米通、午餐肉、生果、清水、汽水、能量飲品都有，現場十足十士多一樣，前店後倉，分別只在於唔使畀錢就可以攞走，強哥話喎：「係人都食得，淨係我老細唔食得！」
芸芸物資中，咖啡最受歡迎，因為工人要養足精神、捱眼瞓打呢場硬仗，所以成批罐裝、樽裝咖啡送嚟時，旋即被掃清，佢仲話蘋果多到冇人食。
湯水慰勞 鐵漢感動
有市民噚日一朝早自製咗幾盒蛋糕、前晚連湯水都帶埋嚟慰勞工人，鐵漢強哥都話好感動，「真係覺得全世界都支持我哋」。噚日中午時分，有市民更加送嚟三十幾箱樽裝水，唔少工人都幫手搬貨。
負責幫工人將物資情報上載到facebook嘅中大學生阿飛話，除咗乾糧，前幾日因為天氣轉冷同埋工人決定通宵留守，佢哋需要大量禦寒衣物，有市民即時喺製衣廠找來厚衫同棉被，希望工人唔使凍親。
http://[email protected]