前特首董建華夫婦噚日中午喺金鐘遠東金融中心露面，以前塊面肥嘟嘟嘅董太趙洪娉瘦咗成個碼。董伯伯小心翼翼攙扶佢落車，但見董太戴上黑超、梳咗個髻，穿長裙再加件冷外套，睇落有啲弱不禁風。
董伯伯唔回應佔中
董太近期露面不多，佢早於2011年尾出席霍英東三夫人林淑端喪禮時已經明顯消瘦，不過噚日所見，佢又再瘦多一個圈，真係有少少憔悴。
董伯伯偕董太走咗入去大廈入面一間日本料理開餐，接近兩點先一齊離開。
八方同事問董生點睇佔領中環？佢揮一揮手，冇半點回應，尾隨嘅董太冇出聲。不過董太行動較為緩慢，花咗啲時間先上到車，勉強露出笑容揮手離開。
