咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【牛腩篇】呢幾日要返工，上班途中見到一班班年輕人抱住輕鬆心情去街街，逼滿各大商場、食店、戲院，先醒起踏入復活節加清明長假，更令小弟懷念昔日學生哥享受長假嘅日子。
韋根享受完一季頭三分二假期，終於又認真番玩護級，上周六小勝諾域治，上番17位安全線，數番佢哋呢期戰績，近6仗3勝1和2負取得10分，竟然係英超近6仗積分榜排第7，只有曼聯、阿仙奴、利物浦等6支球隊好過佢。或者球迷歸咎韋根往往成功護級在於「有人幫」；包括上季主場1:0擊敗曼聯，本地足球評述員都講呢場波有疑點所在。但就算有人幫，贏波都要靠自己，君不見曼聯上周六作客新特蘭，都係hea住踢，黑貓一樣拎唔到分。
其實個人對韋根有唔錯嘅好感，畢竟由馬天尼斯任領隊，踢出唔錯嘅地面組織戰術，習慣3-4-2-1陣式，亦都係走在戰術尖端。雖然卡林麥馬拿文之前對紐卡素嘅收山腳，多少令人扣分，但傳統上韋根都唔係茅柴球隊。而另一個對韋根嘅尊敬，係佢哋一直維持限米煮限飯嘅情況下，05年升班以嚟一直保住席位。好似新兵干尼，350萬歐元身價，已經累積10個英超入球，球隊眼光真係準；但身為阿仙奴擁躉，外借宮市亮去韋根，可惜傷多過踢，對韋根冇好處之外，呢位日本小將又唔可以增加比賽經驗。
睇番餘下秩序，韋根對手有QPR同維拉兩場護級大戰，又要同米禾爾爭英足盃決賽權，形勢仍然未算輕鬆，但以往績睇，佢哋都應該走得甩。文：牽牛